Serbisio ti Capitol Express, agtultuloy agingga nga adu ti request dagiti umili

Impanamnama ni Ilocos Norte Gobernador Ma. Imelda “Imee” R. Marcos nga agtultuloy ken agsubli-subli ti Manang Imee’s Capitol Express (CapEx) kadagiti nagduduma nga ili ditoy probinsia tapno maiyasideg iti serbiso kadagiti umili.

Kuna ti gobernador nga agingga nga adda ti request dagiti kaprobinsiaan, saan met nga agsarday ti lideratona a mangipaay kadagitoy a kiddaw babaen iti nasao a programa.

Inpalagip met ti gobernador ti pannakaipalawa pay ti saklaw ti PhilHealth tapno naan-anay a mabenepisiaran dagiti kaprobinsiaan kangrunaanna dagiti natataengan.

Masapul a tunggal pamilia ket addaan iti PhilHealth a pagbinnadangan a bayadan ti probinsia ken ti maseknan a local government unit tapno amin ket pagnam-ayan ti benepisio ti PhilHealth.

Impasingkedna a maipangpangruna a mailista dagiti kameng ti pamilia nga agtawen iti 60 agpangato gapu ta dagitoy ti ad-adda nga agkasapulan no bilang agsakit ken maiserrekda iti ospital.

Idiay Paoay, Ilocos Norte ti nagturongan ita nga aldaw ti team ti CapEx a nangitundaanda manen kadagiti adu a tilapia fingerlings a kiddaw dagiti umili nga umabut iti 27,200 a pedaso ken naibunong kadagiti 60 a recipients.

Segun ken ni Ms. Connie Pascua iti Provincial Agriculture Office, daytoy pay laeng iti kaadduan a kiddaw dagiti umili kangrunaanna kadagiti agindeg iti asideg ti karayan wenno baybay.

Iti agdama, adu manen ti request dagiti umili a manamnama a maidanonto manen iti sumaruno a panagsubli ti CapEx iti nasao nga ili. (PGIN-CMO)