Essem kas
iti layap iti awan naganna a panaguray
Amado I.
Yoro
Enero 20,
2015
No dadduma diskutiren ni mannaniw:
Ti essem no dadduma apagdarikmat
Kas iti layap a tumpuar iti sabali
A pingping ti mangliwenliweng a law-ang
Dagiti rabii iti panagpuyat wenno pannakasegged
Ti kandela iti tengnga ti rabii iti kasipngetan.
Nakapanawen ti mutia iti apagdarikmat
A sam-it dagiti palabra de amor
Kuna ti mannaniw: pimmanawkan
Nga awanen ti nabati a pagilasinan
Imbag pay ketdi ti uram iti rabii
Kadagiti narayray a panagpasged
Iti kapanagan dagiti riniwriw a sirmata
Iti gumaygayebgeb a panagputar
Iti dumalinesnes a panangpasungad
Iti agnadnadnad a segged ken gayebgeb
Ti beggang matda a kasla matmaturog
Nga engkantada dagiti adu a diosa
Ti kayaw, diosa ni ayat, diosa ni pintas
Kas kadagiti diosa iti olympus
Diosa ti init, ni neptuno, saturno ken Venus
Dagiti diosa ti signo magnum
Agkiray ti tarigagay maminsan manen
A sumgiab kadagiti pondido a pagsaingan
Awanen ti layap, ti layap, nagpukawen
Simmurot a pimmanaw ti mutia
Ni mannaniw natda a malmalday
Kadagiti naluaan a sensennaay
Kadagiti riniwriw a panagsapul
Kadagiti rinaay riniwriwriw a bituen
Dagiti agpakpakada a rabii ken parbangon
Agpadpadto manen ni mannaniw
Iti awan nagan a panagdung-aw
Iti aren-eng ti lira ken kutibeng
A mangsangsangal a karaip sangatedted
A lua, panagsaning-i iti saan pay nabuniagan
A pannakaulila nga ipapanaw
Agur-uray kadi pay iti panagsubli ti mutia?
Comments
Post a Comment