Basic martial arts, naiyadal kadagiti estudiante

Saan laeng a pang-sports ti nakairantaan iti naisayangkat a nagmalmalem a basic training on martial arts no di pang-self-defense para kadagiti estudiante nga agad-adal iti sekondaria iti umuna a distrito ti probinsia.

Daytoy ti inbatad ni Ilocos Norte Gobernador Ma. Imelda “Imee” R. Marcos iti ididiklawitna iti lugar a nakaisayangkatan ti aktibidad iti mismo a Laoag City Multi-Purpose Center idi Marso 7, 2014.

Ti basic martial arts training ket paset ti aktibidad ti Women’s Month Celebration.

Kuna ti gobernador a nupay “basic” laeng ti naisuro kadagiti ubbing babaen kadagiti police women iti PNP Provincial Office, dakkelen a banag daytoy kadakuada a pangdepensa iti bukod a bagi no bilang adda ti mangabuso wenno mangdangran kadakuada.

Saan a linged iti gobernador dagiti mapaspasamak a kinadamsak ken pannakadangran dagiti babbai ditoy probinsia kas iti panagrames, sexual harassment, domestic violence ken dadduma pay.

Impasingked ti gobernador a saantayo nga ipalpalubos nga adda dagiti mangidadanes kadatayo uray pay mental torture, verbal abuse, financial wenno economic abuse.

Gapu iti daytoy, kuna ti gobernador nga importante unay nga adda ti ammo dagiti pada a babbai a mangsalaknib  iti bukod a bagi.

Naiyadal kadagiti estudiante ti panagaramat iti arnis ken panagusar iti payong ken ballpen a mabalin a pangdepensa iti bagi no bilang adda dagiti aggandat a mangdangran kadagitoy.

Ti aktibidad ket nagbibinnuligan nga insayangkat dagiti kameng ti Gender and Development, Provincial Social Welfare Office ken ti Provincial Education Dept. ken ti kapitolio probinsial.

Umabut iti 135 nga estudiante manipud iti Ilocos Norte National High School ken iti Bacarra National Comprehensive High School dagiti nagbalin a partisipantes ken 35 met dagiti women police manipud iti PNP Provincial Office a nangtraining kadagitoy nga agad-adal.

Maisayangkatto met inton Domingo ti Basic Training on Martial Arts Seminar dagiti estudiante iti biang ti maikadua a distrito kas paset pay laeng ti Women’s Month Celebration. (PGIN-CMO)