Kalpasan
ti balligi a pannakaisayangkat ti umuna a Mobile Service ti Professional
Regulations Commission (PRC) ditoy probinsia itay bulan ti Pebrero, agsubli
manen dagiti kameng ti PRC-Baguio tapno mangisayangkat ti serbisio kadagiti
agkasapulan nga umili.
Segun ken ni Nicole Rudio, Public Employment
Services Office (PESO) head iti Provincial Capitol, pinili ni Gob. Ma. Imelda “Imee”
R. Marcos ti Marso 25 a pannakaisayangkat ti Mobile Services gapu ta manamnama
a maiparuk-at ti resulta ti Licensure Examination for Teachers (LET) inton umay
a Sabado.
Babaen iti daytoy a ganuat, saanen nga
agparikut dagiti kabarbaro a nakapasa iti eksamen nga agaplikar iti lisensia.
Kunana nga uray dagiti agre-take wenno
baliw a dumalan iti eksaminasion para iti Nursing Board exam inton Marso 28,
ket mabalinda ti agaplikar para iti nasao nga eksaminasion.
Kunana a naituding nga umay dagitoy inton
Marso 25 iti mismo a La Tabacalera Function hall a lugar a
pakaisayangkatan ti PRC mobile services.
Inbatadna nga uray dagiti nagrequest iti
PRC Identification Card itay napan a bulan ti Pebrero ket mabalindanton nga
alaen kabayatan ti kaadda manen dagiti kameng ti PRC–Baguio ditoy probinsia.
Ti iyuumnay manen dagitoy ket gapu iti
panangkiddaw manen ni Gobernador Marcos kalpasan a nakitana ti napintas a
resulta ken panagbalin a nabunga iti immuna a Mobile Service ti PRC.
Insigida met nga inaprobaran ti PRC ti
kiddaw ni Gov. Marcos gapu ta napaneknekanda nga adu dagiti tao
a natulongan ken nanggundaway kadagiti ipapa-ayda a serbisio. (PGIN-CMO)
Comments
Post a Comment