Exam ken trabaho

Ania’t kinagpaysuanan dagiti inpormasion a ti rason no apay a kanayun a nangato ti board examination—passing percentage dagiti dadduma nga unibersidad ket gapu ta pilienda dagiti palubusanda nga ageksamen.

No ti graduate ket saan a nangato dagiti gradona wenno saan unay a napintas ti performancena, mangaramid ti pamuspusan ti unibersidad tapno saan pay laeng a maka-exam.

Ti laeng palubusanda nga ag-take ti board exam ket dagiti sigurado a makapasa. Daytoy ket tapno sigurado met a nangato ti passing percentage ti unibersidad, banag nga addanto manen ipangpangasda iti intero a lubong.

Ala, saan a dakes nga ipangasda ti performanceda iti board exam. Ngem ti ayanna nga adat, adda dagiti graduate a nairurumen, naipaigid ken naisakripisyo tapno laeng maidaydayaw ti pagadalan.

Moral kadi daytoy? Legal kadi? Paset kadi pay laeng daytoy ti makunkuna nga academic freedom ti unibersidad?

Sapay koma ta makadanun daytoy nga issue iti biang ti Kongreso wenno iti opisina ni Presidente Duterte tapno maimbestigar a nasayaat ket maikkan ti hustisia dagiti graduate a nailupeklupek lattan dagiti karbenganda.

***

Agpayso kadi a 200 to 500 nga empleado ti maikkat iti baro nga administrasion iti city government ti Laoag?

Karbengan ni MMK a mangbukel ti work force a patienna a makatulong kadagiti ipakatna a programa ken proyekto. Paset pay laeng daytoy ti panangipatungpalna ti bukodna nga estilo a kas baro a lider ti ciudad.

Ngem saan koma met a kastoy ti kaadu unay dagiti maikkat nga empleado. Ta arigna political cleansing nukuan ti mapasamak, banag nga adu dagiti agsagaba a pamilya. Kaasida met, apo, nangnangruna kadagitoy a tiempo a narigat ti agsarak ti trabaho.

Ti laeng koma maikkat ket dagiti sadot, subeg, inutil, birkog ken dagiti agbalbalin a "fixers”.

***

Ti maysa a tao ket posible a maikkat iti trabaho gapu ta isuna ket abusado wenno sadut wenno birkog wenno irresponsable. Ngem saan koma a mabalin a maikkat iti panggedan ti maysa a tao gapu iti pulitika, awan laketdi ti sinalungasingna a paglintegan. Ti kada tao ket adda karbenganna a mangpili ti prinsipiona iti pulitika, isu a saan a rumbeng a daytoy ti pakaikkatanna iti trabaho.

Ti trabaho ket paset ti "right to life"—ti makunkuna a "highest right". Ngamin, no keltayem ti pagbiagan ti maysa a tao, kineltaymo metten ti biagna ken ti biag ti pamilyana.

***

BARD NOTES: Happy bard-reading to Badoc ABC President Virgilio Calajate, Ilocos Norte Provincial Treasurer Josephine P. Calajate, INEC President Enrico Ruiz, INEC Director Joseph Vergel P. Calajate, Provincial Agrarian Reform Program Officer II Vic M. Ines, DAR Chief Administrative Officer Rudy Acacio, Ms. Genedine Domingo Jambaro and PNB Pasuquin Branch Manager Metty V. Guerrero.

Greetings also to the employees of JVC Consortium, AMA Laoag, Ilocos Norte Regional School of Fisheries, Laoag City PNP, DAR Ilocos Norte, DepEd Laoag, DepEd Ilocos Norte and PNB Pasuquin.