Umuna a Bonsai Academy ditoy Pilipinas, nalukatan babaen iti panagkammayet ti gobierno probinsial ken MMSU

Pormalen a nalukatan ti Bonsai School iti Mariano Mariano Marcos State University (MMSU) a nagpagsursuruan dagiti estudiante a mayat nga  agpatanor iti mula a bonsai.

Ti pannakalukat iti Bonsai School ket naigiddan iti maika-36 a Foundation Anniversary ti MMSU a nangablaawan metten ni Gobernador Imee Marcos kadagiti mangimatmaton iti nasao nga unibersidad.

Dimmar-ay iti nasao nga okasion ni Professor Amy Liang, Presidente ti Asia-Pacific Bonsai Friendship Federation ken dagiti kakaduana  manipud idiay Taiwan.

Dinayaw ken immunan a nagyamanan ni Gobernador Imee Marcos dagiti Taiwanese masters nga umuna a mangiyadal kadagiti maseknan a mangisursuro iti MMSU no kasano ti napintas ken epektibo pay a panagpadakkel iti bonsai ditoy Pilipinas.

Mamati ti gobernador a dakkel ti maitulong dagitoy gapu ta nayon pay a pamastrekan dagiti umili gapu ta nangina dagiti mula a bonsai no mailako iti local a mercado ken uray idiay ballasiw taaw.

Kabayatanna, namnamaen met  ni Dr. Miriam Pascua, Presidente ti MMSU nga iti katengngaan daytoy a bulan ti Enero iti panagawatdan kadagiti estudiante a mayat nga ag-training ken agsursuro  iti napintas a panagmula iti bonsai.

Nupay kasta, kunana a limitado pay laeng iti bilang dagiti awatenda nga estudiante agingga iti 30 nga agsursuro iti uneg ti innem a bulan.

Imbunannag ni Pascua a nangipaay iti grupo dagiti Tawainese  dagiti mausar a materiales nga agbalor iti  100 a ribu a pisos ken  cash donation a 10,000 dollars para iti Bonsai School.

Naan-anay met a supurta iti ipapaay ti gobierno probinsial babaen ken ni Gob. Imee iti nasao a pagadalan kangrunaanna iti panagsursuro iti napintas a panagmula iti bonsai. (PGIN-CMO)