Ilocos Norte, ballaigi ti pannakaisayangkat ti R1AA

Laoag City—Dakkel a ballaigi iti gobierno probinsial ken Schools Division of Ilocos Norte (SDOIN) iti pannakaisayangkat ti 2019 Region I Athletic Association (R1AA) Meet idi Marso 6 ingana 11. Nagtalinaed a naurnos ken nabunga dagiti napasamak nga aktibidad, ken nagawid dagiti delegado nga addaan adu a napipintas a pakalaglagipan iti probinsia ti Ilocos Norte.

Indauloan ni senior Sangguniang Panlungsod member Matthew Marcos Manotoc ken ni Ilocos Norte Vice Governor Angelo Marcos Barba dagiti kameng iti gobierno probinsial bayat iti pananglukat a program iti R1AA. Ni SBM Manotoc ken Vice Governor Barba iti nangawat ti bandera iti R1AA nga aggapo iti ofisiales iti Alaminos City a nakaangayan met ti R1AA iti napalabas a tawen.

Pinasangbay ti probinsia iti nasurok 10,300 a delegasion dagiti atleta, mangisursuro, ofisiales ken dagiti mangidadaulo manipud iti agbibinnalubal a schools division: Alaminos City, Batac City, Candon City, Dagupan City, Ilocos Norte, Ilocos Sur, Laoag City, La Union, Pangasinan I, Pangasinan II, San Carlos City, San Fernando City, Urdaneta City, and Vigan City.

Pinasingkedan ni Mr. Manotoc bayat ti opening program a napasamak idiay Ferdinand E. Marcos Memorial Stadium idi Marso 6 a indiaya ti Ilocos Norte dagiti maipagpannakkel a kababalin ken kannawidanna tapnu agtultuloy iti pinagkikinnamayet dagiti amin a umili. Innayonna a nasken a mapalagipan dagiti agbibinnalubal nga atleta nga agtultuloy a makisalip nga addaan respeto, dignidad ken kinamanagpakumbaba.

Malaksid iti pannakaisayangkat iti sporting events, nagkakaysa pay dagiti delegasion babaen iti pannakipagpasetda a nagmula iti mangrove iti Brgy. Davila idiay Pasuquin. Kangrunaan a gagem daytoy nga aktibidad ti pannakatagiben ti aglawlaw. Kas paset pay ti panagsaluad iti aglawlaw bayat a maararamid iti R1AA, nagbalakad iti SDOIN iti pannakalimitar iti pinagusar iti plastik.

Sakbay pay iti pinangrugi ti R1AA, naruayen dagiti addang ti gobierno probinsial tapno maipasigurado ti pinagballaigi ti programa, kas kuma iti pannakaisagana dagiti quarters a pagyanan dagiti delegado ken pannakatarimaan ken pannakadalus dagiti pakaangayn dagiti ay-ayam. Naiget met ti pannakikoordinar ti gobierno probinsial ti Philippine National Police tapno agbalin a natalinaay ti pannakaisayangkat ti R1AA 2019. Kasta met a dinawatda pay ti suporta dagiti gobierno local. Maipalagip a naisayangkat pay iti vaccination dagiti makisalip nga atleta tapnu malappedan iti measles outbreak.

sirMATTa ti MARCOS

Dakkelen ti nagbaliwan ti Ilocos Norte sipud iti kaudian a panag-host ti probinsia iti Region One Athletic Association meet idi tawen 2009.

Impasingked ni Mr. Manotoc a nabayagen a sinagaan daytoy ti probinsia kangrunaanna ti Ilocos Norte Sports and Development Office.

Inlawlawagna a nangisayangkatda ti meeting ken koordinasion kadagiti maseknan a departamento iti Provincial Government of Ilocos Norte kas panangsuporta iti Department of Education (DepEd).

Maysa ni Mr. Manotoc kadagiti napalaus a mangitantandudo kadagiti pagsayaatan dagiti agtutubo nga umili. Maibilang kadagiti gakat nga ipangpangrunana ket dagiti mainaig ti pagsayaatan ken pudno a pannakamuli dagiti agtutubo tapnu magun-odda ti makunkuna nga holistic development.

Ni Mr. Manotoc ti maysa kadagiti kaubingan a bokal, gapu nu apay isuna ti mangibagi kadagiti agtutubo iti Sangguniang Panlalawigan. Malaksid ti pinagidaulo na a kas Chairman ti Movement of Young Legislators-Ilocos Norte Chapter, maysa pay isuna a basketball coach ti International School Manila ken sports agent ken co-founder ti Espiritu-Manotoc Basketball Management nga addaan iti nasurok 80 a Philippine Basketball Association (PBA) players.

Inpangpangrunana a buinangay iti provincial athletic scholarship babaen ti Ordinance No. 005-2016b a mangited ti cash incentives kadagiti student athletes a makisalip ti regional ken national athletic meets. Intultuloyna iti panangipangpangruna ti pagsayaatan dagiti agtutubo babaen ti Ordinance No. 049- 2018 a namangpaymaysa kadagiti nagduduma nga scholarship iti gobierno probinsial pakairamananen ti senior high school (SHS) scholarship.

Babaen met ti pinutar ni Mr. Manotoc nga Ordinance No. 008-2016, nabuangay dagiti city and municipal youth development offices a katulungan ti Ilocos Norte Youth Development Office (INYDO) tapno maipasigurado a sapasap iti serbisio ken tulong a maipaay kadagiti agtutubo.

Tapnu ad-adda pay a mamuli dagiti agtutubo iti benneg ti isports, nabuangay ti Ilocos Norte Youth (INYo) Games babaen ken SBM Marcos. Ti INYo Games ket maysa a summer youth sporting event a tinawen a danggayan ti rinibu-ribo nga agtutubo manipod iti 21 a munisipio ken dua a siudad ti Ilocos Norte. Kangrunaan a gagem daytoy a pay-ayam ti pannakaital-o ken pannakapreserba dagiti traditional Filipino games kas koma ti patintero ken agawan-base.

Babaen met iti pannakaipatakder ti three-generational or “3G” playgrounds ken fitness parks iti intero a probinsia, gagem ni SBM Manotoc a gutiguten dagiti umili a maadaanda iti lugar para iti active lifestyle babaen iti outdoor play ken recreation. Dagitoy a parke ket addaan playground equipment, stationary bikes ken naduma-duma nga exercise apparatus.

Gagem na a saluadan iti kinasalun-at dagiti umili tapnu agbalin met a natalged iti probinsia. Kas maysa kadagiti “The Ilocos Times 2019 Outstanding Ilocano Awardee for Public Service,” agtultuloy a “Mangbiag, Mangpapigsa, ken Mangidaulo” ni SBM Marcos. Iti tinawidna a sirmata para iti idudur-as ti sibubuo a Ilocos Norte ket agnanayon a narimat.

Kinatan-ok ni Ilokano, napasingkedan manen

Naduma-duma dagiti pakasaritaan a napan inparangarang dagiti nakipagpaset iti opening program. Kangrunaanna, inpakitada ti pakasaritaan dagiti dua nga Ilokano a ni Lam-ang ken Teofilo Yldefonso.

Naipalagip ti pakaistoryaan ti kinatured, kinaandur ken kinamangipateg a kababalin ti dua a bannuar. Ni Lam-ang iti nangipasumudaag a iti kinabileg ken kinatured ket maipakita babaen ti pinangipateg ti pamilya, panang-aklon dagiti kinapudno ti biag ken panangsaluad ti dayaw ken talugading ti bukod a komunidad.

Ni Mr. Yldefonso a maaw-awagan ti “Ilocano Shark”  ti nangipasingked iti napabaro a kinabileg ken kinatan-ok dagiti atleta nga Ilokano gapu ta isuna ti kaunaan a Filipino a nangabak idi sumagmamano a medalia iti Olimpiks.

Nayon a parte iti programa iti Tadek Festival iti ili a Nueva Era ken Empanada festival iti ili a Batac ken kasta pay ti performance ti Samiweng Singers. Kasta met a rinubu-ribo ang mangisursuro manipod iti Department of Education- Ilocos Norte ti nakipagpaset iti programa babaen iti speech choir ken pinagsalada.

Imbunannag ni Ilocos Norte Schools Division Superintendent Vilma Eda ti intero a probinsia para ti R1AA ket tanda iti panagayat haan laeng para iti isports nu di ketdi amin a nakipaset a delegado.

Sinaluduan met ni DepEd Assistant Secretary Revsee Escobedo iti narambak ken naurnos a seremonia ken kasta pay a dinayawna iti “solid performance” ti sibubukel a Region I. Kuna dagiti delegado, ti R1AA 2019 ket maysa kadagiti kababallaigian, nu haan man a kababalaigian, nga edision iti nasao a pay-ayam. (EJD)