Kapalmuks!

Ang tao raw ay nagmula sa lupa. Pero kung minsan, mas naniniwala ako na ang tao ay sa kongkreto nagmula. Sabagay may relasyon din ang lupa’t kongkreto, ngunit ang purong lupa ay malambot at manipis, samantalang ang kongkreto ay matigas at makapal.

Tingnan mo ang katabi mong tao, salatin ang kanyang mukha at bahagyang pisilin ang kanyang pisngi. Ano ang sumalubong sa’yong kamay? Ano ang tumambad sa iyong pakiramdam? Manipis o makapal? Malamang nagkakalyo ang iyong kamay sa paghagod sa kara ng isang nilalang na nagmula sa pinatigas na semento.

Maglupasay ka man sa korte ng kapalaran, hindi mababaligtad ang katotohanang ang buhay ay puno ng mga humihingang kakapalan. Kung minsan naiisip ko na talaga yatang mali ang ilang teorya kaugnay ng pinagmulan ng buhay, tulad ng Big Bang Theory, Natural Selection at Theological Origins. Ang buhay yata—lalo na ng tao—ay nagmula sa isang cement factory dito sa hilaga.

Naghahanap ka pa ba ng ebidensya ng katigasan ng mukha? Wag ka nang lumayo, tingnan mo na lang ang mga katrabaho o kaopisina mo.

Ang empleado sa iyong kaliwa, malamang ito ang ginagawa: Nagkukunwaring very busy, nakakunot pa ang noo sa lalim ng iniisip. Subalit kung tingnan mong maigi ang kanyang kinakalikot, isa palang brochure ng iba’t-ibang produkto—namimili pala siya ng uutanging make-up, lipstick, pabango, panty at bra. Sinasabayan pa ng pagsalat sa kanyang dibdib, tinatantya kung kailangan na nya ng push-up na produkto.

Ang empleado sa iyong kanan, malamang ito ang pinagkakaabalahan: Nagbubulatlat ng mga papel sa kanyang harapan. Seryoso s’ya at pailing-iling na parang may malaking problemang kinakaharap. Siliping mabuti ang mga tila maliliit na dokumentong hawak n’ya. Sus! Mga natalong tiket n’ya sa lotto! Nag-iisip pala siya ng bagong balasa. Sa ilalim ng mga lotto ticket, naghahari naman ang listahan ng mga numerong lumabas sa jueteng.

Ano naman ang masasabi mo sa’yong boss na ang desk ay nasa mismong harapan mo? Wala, wala kang masasabi. Wala kang masasabi dahil parati naman siyang wala! Saan ba s’ya nagpupunta? Saan pa e di sa meeting! Kaw talaga, ang hina mo! Meeting ng mga tsismoso’t tsismosa sa canteen, sa hallway at kung saan-saan pang sulok ng gusali. Kung minsan naman, nasa seminar s’ya. Seminar na puno ng pagliliwaliw, shopping spree, pagpapa-cute, pag-iisip ng paraan ng pagkupit sa liquidation at pagkuha ng certificate of attendance kahit hindi pumupunta sa lectures.

O, saan ka pa? Punta ka pa ba sa kabilang division upang mapatunayang maraming makakapal sa mundo? E ang bilang ng mga kapalmuks sa opisina n’yo pa lang, sapat nang pantapal sa mga lubak sa national highway. Matibay pa! Kung idagdag mo pa ang lahat ng makakapal sa boung gusali, baka makagawa na tayo ng mga tulay na magdudugtong-dugtong sa lahat ng mga isla sa Pilipinas.

Hay! Ganyan talaga ang buhay. Minsan, nagtungo ako sa simbahan, maluha-luhang nanikluhod at taimtim na nanalangin. Ipinagdasal ko na sana’y mawala na ang lahat ng kapalmuks sa ibabaw ng mundo. Please Lord!

Ngunit, habang sinasambit ko ang aking panalangin, tila sinasagot ako ng Diyos at ipinapakita ang magiging resulta ng aking hinihiling. Ang maaring maging resulta: Walang matitirang tao sa mundo—pati ako, kasamang maglalaho! Ibig sabihin: makapal din ang pagmumukha ko.

Kaya bigla kong binawi ang aking panalangin! Erase-erase! Ayoko pang mag-evaporate! Ikaw, gusto mo na ba? Mas mabuting manatiling makapal kaysa kunin na ng Maykapal.

Subalit sa likod ng kakapalan ng ating mukha, sana hangga’t maaari’y mag-iwan tayo ng kahit kaunting malambot na bahagi sa ating puso. Sana, kahit paminsan-misan lang, ang ating katigasan ay magsilbing kalasag ng mga naaapi’t mahihina. Sana, kahit ilang sandali lang, ang lakas ng ating apog ay magamit naman sa pagpawi ng kalungkutan ng mga maralita.

Huwag nating kalimutan, lahat tayo’y may obligasyon sa ating kapwa tao, makapal man, mas makapal kesa sa’yo o pinaka-kapalmuks sa boung mundo. 

***

BARD NOTES: Special thanks to INWD General Manager John Teodoro, INWD Board of Directors and all employees of Ilocos Norte Water District. 

Happy bard-reading to Congresswoman Imelda R. Marcos, Mayor Chevylle V. Farinas, Vice Mayor Michael V. Farinas, Mayor Jeffrey Jubal Nalupta, Board Member James Paul “Goro” Nalupta, Mr. Efren Bartolome, Ms. Pia Salapongol, Dr. Chester Puño, Dr. Sme Juancho Estrella and Atty. Yvette Convento- Leynes.

 

Happy reading also to Provincial Treasurer Josephine Calajate, INEC Director Virgilio Calajate, Ms. Cecil Nalupta and the employees of Philippine National Bank – Laoag Branch, AMA – Laoag Campus,  DepEd – Laoag.