ENRO itultuloyda ti panagmula iti kabanbantayan

Agtultuloy ti ar-aramiden dagiti kameng ti Environment and Natural Resources a panagmula kadagiti kabanbantayan ken kabakiran ditoy probinsia.

Kuna ni Estrella “Baby” Sacro, National Greening program Project manager a  daytoy ket tapno masalakniban iti aglawlaw ken maalay-ayan iti nakaro nga epekto ti climate change.

Nagyamyamanan met ni Sacro ken ni Ilocos Norte Gobernador Ma. Imelda “Imee” R. Marcos gapu ta maysa ti re-greening kadagiti ipangpangrunana a proyekto.

Mamati ni Sacro nga apaman a madanon ti tawen 2016, natalged ken napintaston dagiti kabanbantayan ditoy probinsia.

Kunana a babaen kadagiti barangay ranger officers (BROs) a dinutokan ti probinsia ket dakkel a kabadangan a mangkita ken mangsalaknib kadagiti mula iti kabakiran ken kabanbantayan.

Gapu kadagiti BRO, in-inuten  a mapugipog dagiti agisaysayangkat ti saan a makianatad a panagpukan ti kayo ken panagkaingin iti bantay.

Mangnamnama ti Project Manager ti National Greening Program ti ENRO nga iti tawen 2017 a pannakarambak ti 100 years a panagkasangay daydi sigud a Presidente Ferdinand E. Marcos, agbalinton a makaay-ayo ti forest cover iti Ilocos Norte. (PGIN-CMO)