Provincial Engineering ken Zanjera ti probinsia, i-yiskedyulda ti mabalin a pannakaipabulod iti back hoe

Ibubulod iti back hoe ti probinsia partikular iti Provincial Engineering Office ti nagbalin a kiddaw ni Barangay Kagawad Rodolfo Sugui ti Barangay Sugui iti ili a Pinili kabayatan ti panagturong iti Manang Imee‘s Capitol Express.

Kunana nga usarenda daytoy iti pannakakutkut ti small farm reservoir wenno waig iti lugarda para iti Zanjera Gabor.

Daytoyen ti maikapat a gundaway a pannakakutkut ti nasao a waig a pangal-alaanda ti nalabon a danum a pagpasayak dagiti mannalon iti second cropping.

Kunana a kabaelanna a padanuman iti 50 nga hektarya ti kalawana a pagtatalonan iti lugarda.

Gapu iti daytoy, kuna ni Sugui a dakkel ti maitultulong ti Capitol Express a programa ni Gobernador ma. Imelda “Imee” R. Marcos  gapu ta as-asidegenen a pangidanonan dagiti umili  kadagiti arungaingda iti gobierno probinsial imbes nga agpleteda pay nga agturong iti kapitolio probinsial.

Impasigurado met ti pannakabagi ti Provincial Engineering Office ken ti Zanjera ti probinsia a kitaen ken i-yiskedyulda iti aldaw a mabalin nga available iti back hoe a maipasublat iti Barangay Aglipay, Pinili, Ilocos Norte.