Ay, biag!

Ni Leonardo Rosqueta Agunoy

GAPU iti G. R. O. (Guest Relation Officer), ama, naipasubo, aggammat ti… Namulta iti 14 thousand!. Gapu iti G. R. O., naka-bill (iti pagiinuman) iti 5 thousand, sinaka dagiti barangay officials!

Maysa laeng daytoy manipud kadagiti maaw-awatko a reklamo/kissiim a naibinggasan iti pammabalaw manipud kadagiti reactor a concern citizen. Ammoyo, kakabsat, no asino ti naggapuan daytoy reklamo a naidatag iti ngato?  Maysa a masisidon a lumugar a pagrarairaan dagiti naruay a G. R. O!  Mabalin a kunaen a nalabes unayen ti kinakaro ti panagraraira ti prostitution!  Uray pay ngamin kadagiti barangay (iti away) nga agisaysayangkat ti barangay fiestana (Patronal Fiesta pay ketdi, a). Maawatantayo ti karirikna ti reactor,  kakabsat. No di man mismo nga aggapu iti  familia daytoy ti mabalin a maisungsong a mapmapan iti ayuyang dagiti G. R.  O, mabalin a maysa ketdi a makapagdasig ti nangisit ken puraw. Ti kayattayo a sawen, no ania ti rumbeng ken di rumbeng a mapaspasamak iti aglawlawna. Ditay’ ketdi masdaaw a kadagitoy a panawen, kapinget ti balubal da kinaimbag ken kinadakes. Ti ayanna a pagdaksan, nabilbileg sa metten dagiti kinadakes ti mapaspasamak iti aglawlawtayo, kakabsat?  Banag a pagtaudan dagiti  naruay a reklamo ken pammabalaw. No pammabalaw, kunatayo, nalabit, maiturong kadagiti concerned barangay officials. Ti saludsod: apay ngamin nga ipalubosda iti kaadda dagiti G. R. O kadagiti pagfiestaan?  Ania unay, aya, ti pagsayaatanna a maipaayna kadagiti  maseknan a lugar?  Ammotayon ti dadduma a makaigapu: tapno adu ti kuarta a mapastrek dagiti akinkukua kadagitoy nga umok ti ragsak ti lasag a kunada. Iti kasta a pasamak, dakdakkel met ti mapastrek ti barangay a pagoperaran daytoy makapadurmem nga aramid (prostitution)! Dagitoy a makapadurmem nga aramid ti rumbeng a matangguyoban! 

Subliantayo man a pagsasaritaan ti namunganayan ti reklamo a kas nadakamat iti ngato: maysa nga ama ti dina nagawidan ti rasukna ti simbrek iti ayuyang dagiti G. R. O. Gapu ngata iti kinalapana dagitoy, nakapili ti mabalin, a!  Ket, anian ta siempre, agreklamo, a, ti maklaat a G. R. O. a naaprosan nga awan ti sinsao! (No touch no belong, kasla kastan sa ketdi ngamin?  Wenno no honey no money?) Ti simmaruno a napasamak, napan nagreklamo ti G. R. O. kadagiti barangay officials!  Inusayda ti ama iti consejo ti barangay!  Danios: sangapulo ket uppat a ribu a pisos (14 thousand pesos)! Kalpasan a naipamuspusan ti diaske nga ama iti pinagdaniosna, sabalin ti napasamak iti uneg ti pagtaenganna:  sinita ti asawa daytoy ken dagiti annakda!  Ti immawer a kuarta (14 thousand pesos), adu koma ti nakaibanaganna a pagimbagan ti familia: igatang ti taraon, agas, aruaten ken tuition fee dagiti agad-adal nga annakda!  Ti kakas-angan: laklakayan nga ama nga isu koma ti pagadawan ti aramid a pagwadan ngem, saanen ta nalabusanen ti panagraem dagiti adda iti aglawlawna!

Sabali pay daydiay ama a naiturongna ti bagina iti taeng dagiti kalapati a nababa ti tayabna (iti met laeng las-ud ti nakaangayan ti barangay fiesta). Naglippias ti vazo iti naruay a cerveza (BEER). Naartiokan met ngamin ti naubing pay a G. R. O. a kinalamisaan daytoy nga ama. Inikkan ngamin ti G. R. O. iti kaipapanan ti “BEER – Before Every Evening Romance, daddy,” kunam pay, napikar ti ama ngata, a?  Sky is the limit, inkarit ngata met ti pride daytoy. Addaytan, dina metten nadnadlawan pay ti adu nga oras ken gastos daytoy!

Tapno makaruar iti  umok a nastrek ti ama, nagbalinen nga instant  financier dagiti barangay officials!  Kalpasan ti amin, sabalin ti napasamak ti pagtaengan ti ama!

Kastoy kadi lattan ti mapaspasamak, kakabsat?  Agrambaktayo kadi iti fiesta iti barangaytayo tapno laeng maikkan iti gundaway dagiti kakabsat a maiyaw-awan?  Tapno agtultuloy ti immoral activities! 

PAGPAMPANUNOTAN:  Wherever God erects a house of prayer, The Devil always  builds  a chapel there; And ‘twill be found, upon examination, The latter has the largest congregation.  – Daniel Defoe (1660-1731).