Saan a nakapasa iti interview, dakkel pay laeng ti tiansada nga agbalin a call center agents

Sumarsaruno a pagpilian!

Kuna ni Public Employment Services Offices (PESO) head ti gobierno probinsial Nicole Rudio a dagiti aplikante a saan a nakapasa  iti immuna nga interview iti Expert Global Sulutions (EGS), maysa a business process outsourcing (BPO) company, ket sumarsarunoda met laeng a maala no baliw nga agaplikar manen dagitoy.

Ididiaya ti EGS iti Near-hire Training kadagiti saan a nakapasa iti immuna a gundaway babaen ti idadalan iti uneg ti lima nga aldaw a nangrugi idi Enero 9, 2014 iti MMSU- CIT.

Inlawlawagda a maisuro kadagitoy iti conversation on English wenno pannakisarita ti English ken accent neutralization.

Kuna ni Rudio a dagiti mangisuro iti nasao a seminar ket dagiti met laeng trainors nga aggapu iti EGS.

Inbatadna nga addan to pay sumarsaruno a dua a batch wenno bansada dagiti ag-training kalpasan iti umunan a pannakaisayangkatna.

Impasingkedna nga agpaman a malpasda a dumalan iti lima nga aldaw a training, mabalinda manen ti agaplikar iti nasao a kompania.

Kabayatanna, inrakurak ti mangidadaulo ti PESO iti probinbsia nga agtultuloy ti hiring ti EGS iti mismo nga Ilocos Norte Provincial Library wenno I-hub ti probinsia.

Innayonna nga iti agdama, nakapuwesto pay dagiti kameng ti EGS iti Chowking Laoag a pagalaan kadagiti mayat nga agaplikar nga agbalin a call center agent.

Ipapaay met ni Ilocos Norte Gob. Ma. Imelda “Imee” R. Marcos ti naan-anay a supurtana iti daytoy kas paset pay laeng iti Task Force Trabaho a binuangay ti gobierno probinsial tapno ad-adu pay dagiti Ilocano nga maaddaan iti trabaho. (PGIN-CMO)