Padas dagiti nag-volunteer a nagibunong iti ‘Paspas Dur-as’

“Dakkel a tulong ken nakaidayawak ti panangalada kaniak a maysa kadagiti nagibunong iti Paspas Dur-as a pagwarnakan ti gobierno probinsial.”

Daytoy ti siraragsak nga  inbatad ni Jaypie C. Verdadero  a taga  Brgy. Lydia, Marcos nga mangal-ala iti kurso a Criminology idiay iti Data Center College of the Philippines.

Kunana nga iti padasna a maysa kadagiti nag-volunteer a nagibunong iti “Paspas Dur-as” idiay Pagudpud, Bangui ken Pasuquin, naragsak ti riknana bayat iti pannakipulapolna kadagiti sabsabali a tao.

Inlawlawagna a sabali pay ti rikna iti panagibunong ti nasao a pagwarnakan a nakailanadan dagiti nagappuanan ken aktibidad ni Gobernador Ma. Imelda “Imee” R. Marcos ken ti gobierno probinsial.

Kabayatanna, iti biang met ni Mariedale Soriano, agad-adal iti kurso a Technical Teacher for Education idiay MMSU-CIT, nag-enjoy met daytoy iti panagibunongna iti “Paspas Dur-as.”

Nakadanon met idiay Nueva Era ken kaparangetna nga ili pakairamanan iti ili a Dingras a nagiwarasan iti nasao a pagwarnakan ti probinsia.

Naammuanna daytoy a pag-partayman kabayatan iti panagturong ti Sirib Express iti pagadalanda a dakkel ti maitulongna kadakuada nga estudiante ken dagiti out-of-school youth.

Maysa kadagiti kangrunaan a gagem iti baro a programa ti gobernador a Sirib Express ket ti mangipaay iti pagpartyman dagiti estudiante no tiempo iti bakasion.

Kasta met ni Michelle Morales nga agad-adal met laeng  iti MMSU-CIT ken maysa pay kadagiti nag-volunteer.

Kunana a maikadua laeng ti inawatna nga insentibo gapu ta ad-adda a nag-enjoy iti pannakadanonna  kadagiti lugar a nagibunungan.

Nupay kasta, nakatulong met iti nakuartana ti maysa nga aldaw gapu ta adda  pinagbayadna iti pagadalanda.

Innayon dagiti tallo a no addan to pay gundaway a panagibunong manen iti  kadagiti pagwarnakan ti probinsia, kayatdan to manen ti agbuluntaryo a mapan agibunong. (PGIN-CMO)