Foundation Anniversary ti probinsia, naiget a masagsaganaan

Mangrugi ti selebrasion iti 196^th Foundation Anniversary ti probinsia inton Pebrero primero.

Impakaamo ni Ianree Raquel ti provincial tourism officer a daytoy ket babaen iti pannakaisayangkat  ti “Ilumi-Locos Run.”

Inlawlawagna a maysa a daytoy a fun run nga addaan iti adu a silaw wenno neon lights a maaramid  iti rabii  kas paset iti ramrambak.

Kunana a dagiti makipartisipar ket agarwatda kadagiti mabalin a mangsilaw kadakuada.

Iti rota, adda dagiti mangpasuyot kadagiti runners iti danum nga addaan iti nadumaduma a kolor a dagitoy ti agrimat no masilawan kadagiti naipuesto a silaw iti rota.

Inbatadna nga addan to met dagiti maiplastar a nagduduma a silaw iti sango ti kapitolio probinsial a pakaangayan ti selebrasion.

Ti fun run ket mangrugi ken agrengpas iti sanguanan ti kapitolio probinsial.

Kuna ni Raquel a daytoy ket kalpasan a maobserbaran a magustuan dagiti turista ken dagiti kakailian nga umay agpasyar iti kapitolio.

Ditoy to payen iti mabalin a pagpaalaanda ti ladawan kas pakalaglagipan iti sabali manen a Foundation Anniversary ti probinsia.

Dagiti nagduduma nga aktibidad ken programa a nakalinya iti nasao a selebrasion ket kas pangrayray-aw ken pangpadaeg metten iti ramrambak kas kalikagum ni Gobernador Imee Marcos.

Iyaw-awis met ti gobernador kadagiti kakailian ken kadagiti taga kabangibang a probinsia iti iyuumnay panagpasiar ken pannakipagpaset iti nadakamat a selebrasion. (PGIN-CMO)