Nabunga ti naunday a
panaguray dagiti nasurok a dua ribu dua gasut nga aplikante kabayatan ti kaadda
ditoy Ilocos Norte ti mobile service ti Professional Regulations Commission idi
Pebrero 7, 2014.
“Amin a rigatko a
nakipila ket naminpinsan a napukaw apaman a naiyawat kaniak ti napabaro a
lisensiak kas Criminologist,” kinuna ni Leonora Bermiso iti Brgy. Puttao,
Solsona.
Iti met biang ni
Marinel Gaoiran a taga Brgy. 48-A Cabungaan, Laoag City, impeksana met ti
napalaus a panagyamanna ken ni Ilocos Norte Gov. Ma. Imelda “Imee” R. Marcos
gapu ta no saan a gapu kenkuana ket saanda koma a magundawayan ti kastoy a
serbisio ti PRC ditoy Ilocos Norte.
Kadagiti naruay
nga aplikante, dakkel a pakanam-ayanda ti kaadda ti mobile service ti PRC ditoy
probinsia gapu ta malaksid iti taktak, dakkel pay ti masalbar iti panagbiahe
nga agturong idiay Baguio wenno idiay Manila para iti kastoy a pagkasapulan.
Uray ti team lider
ti PRC a ni Wayne Crispin ket nasdaaw iti kaaddu dagiti aplikante.
“Saanko a
ninamnama ti kastoy a bilang dagiti inkam serbian ditoy Ilocos Norte,”
kinunana.
No idasig iti
panagturongda idiay probinsia ti Pangasinan itay arinunos ti tawen, ad-adu nga
amang dagiti aplikante ditoy Ilocos Norte, innayon ni Crispin.
Gapu iti daytoy
impanamnama ni Crispin ken ni Marcos ti inda panagsubli ditoy probinsia
kalpasan ti panagturpos dagiti agad-adal iti kolehio inton bulan ti Abril wenno
Mayo tapno saanen dagitoy nga agrigat iti panagaplikar iti lisensia.
Dagiti serbisio
nga ipapaay ti Mobile Service ti PRC ket dagiti sumaganad: Aplikasion para iti
examination, Panagrehistro iti lisensia, Panagipabaro iti lisensia, ken
panag-release kadagiti nakapending nga ID’s.
Dagiti pannakabagi
ti PRC ket nagtrabaho agingga iti 8:30 iti rabii tapno mairengpas amin dagiti
kasapulan a dokumento. (PGIN-CMO)
Comments
Post a Comment