K

Sa panahon natin, ang mga tinatawag na “may K” ay mga taong may “karapatan.”

May karapatan sa kanilang mga hangarin. May karapatan sa kanilang mga ambisyon. May karapatan sa kanilang mga propesyon.  At may karapatan sa kanilang mga posisyon.

Kaya’t kung tinawag kang “may K”, isa itong positibong pagtingin sa iyong kakayahan, dignidad at maging sa buo mong pagkatao. Isa kang taong dapat pamarisan ng iyong kapwa at dapat bigyan ng karampatang respeto.

Pero kung ika’y tinawag na “walang K”, isa itong malaking insultong inihampas sa’yong mukha. Itinuturing kang walang karapatan sa mga tangan mong hangarin, ambisyon, katayuan, propesyon at posisyon.

Tila ba ipinagsisigawang wala kang kakwenta-kwentang nilalang na hindi karapat-dapat bigyan ng anumang paggalang.

 ‘Yan ang dalawang klase ng tao sa pananaw ng tao—ang mga “may K” at mga “walang K”

Subalit, kabaligtaran ito sa pananaw ng Ancient Rome, lalo na noong kasikatan ni Marcus Tullius Cicero.

Noon, kung tinawag kang “may K”, isa kang masamang mamamayan. Pero kung ikaw ay tinaguriang “walang K”, isa kang idolo at iginagalang ng karamihan.

Bago tayo malito, kailangang malaman natin ang kaibhan “K” sa ating panahon sa bokabularyo ng mga sinaunang Romano. Sa Ancient Rome, hindi “karapatan” ang isinisimbolo ng letrang “K”. Para sa kanila, ang letrang “K” ay tatak para sa mga nagpapabaya sa kanilang mga tungkulin o “kalumniator.”

Halimbawa, kung ang isang abogado o prosecutor ay naging pabaya sa hinahawakan niyang kaso o di kaya’y mali ang kanyang mga akusasyun, tatawagin siyang false accuser—isang “kalumniator.”

Bukod sa mga parusang ipapataw ng batas, ang isang “kalumniator” ay sasailalim sa forehead branding o ang paglalagay ng tatak sa kanyang noo. Ang ilalagay na tatak sa kanyang noo ay isang malaking letrang “K.”

Ang forehead branding ay lalo pang sumikat noong ipagsigawan ni Cicero sa korte na dapat lagyan ng tatak na “K” ang noo ng prosecutor na nagbitaw ng maling akusasyon na parricide sa kanyang kliyenteng si Sextus Roscius.

Mula noon, ang mga pabaya sa kanilang mga obligasyon at mga sinungaling sa kanilang mga propesyon ay nanganganib malagyan ng tatak na “K” sa kanilang noo.

Sa ating panahon, ano kaya ang maging hitsura ng mga tanggapan ng gobyerno kung malalagyan din ng forehead branding ang mga “kalumniator”? Ano kaya ang hitsura ng mga sangguniang? Ano kaya ang magiging pangunahing tanawin sa kongreso? Sa senado? Pati na rin sa mga korte?

Mamamayani kaya ang letrang “K” sa mga noo ng ating mga opisyal?  

Pero kahit bawal na ang forehead branding sa kasalukuyan, sana huwag nating kalimutang itatak sa ating mga puso’t isipan kung sino ang mga pabaya, abusado at walang kwentang lider sa ating bayan.

***

BARD NOTES: Special thanks to INWD General Manager John Teodoro, INWD Board of Directors and all empoyees of Ilocos Norte Water District. 

Happy bard-reading to Governor Imee Marcos, Congresswoman Imelda R. Marcos, Mayor Chevylle V. Farinas, Vice Mayor Michael V. Farinas, Mayor Jeffrey Jubal Nalupta, Board Member James Paul “Goro” Nalupta, Mr. Efren Bartolome, Ms. Pia Salapongol, Dr. Chester Puño, Dr. Sme Juancho Estrella and Atty. Yvette Convento- Leynes.

Happy reading also to Provincial Treasurer Josephine Calajate, INEC Director Virgilio Calajate, Ms. Cecil Nalupta and the employees of Philippine National Bank – Laoag Branch, AMA – Laoag Campus,  DepEd – Laoag, Video City – Laoag, Runner’s High Specialty Shop, Land Bank of the Philippines and Ilocos Norte PNP.