Kastay met la iti maris ti bullalayaw

Adda amin pategtayo iti tunggal banag. Kas tao, nayanak a nalupoy ken matnag iti biddut, ngem ammona ti mangbigbig ti biddut, maawatna met ti panangatur dayta a biddut. Nawada ti panggepna nga agsursuro ken dumngeg a mangpapigsa iti pagkapsutanna.

Adda amin maitedtayo iti bukodtayo a gimong, komunidad ken pamilia. Adda bukodtayo a pagsiriban ken pagpigsaan nga inted kadatayo ti langit. Sagut kadatayo dagiti sirib ken talento.

Yarigko ita iti maris ti bullalayaw no kasano ti kinapategtayo iti tunggal maysa, iti bukod a kolor wenno maris, no panagtutunos ken panagtitinnulong iti aramid kas gunglo wenno grupo, kas komunidad, iti pagsasaritaan.

Iti nagan iti panagserbi iti ania man nga agpang, proyekto ken grupo. Adda bukodtayo a pagduyosan, ti interes, ti pagpigsaan ken linia ti propesion. Iti sabali a bangir, adda met dagiti nasken a papigsaen tapno lumtaw, tumibker ken mapasayaatda a mayataday iti pakasapulantayo.

Adda met kabukbukodan a maris a pakaay-aywan, iti man panagkawes ken iti buya a makaawis wenno makakayaw iti biagtayo. Naikkantayo amin iti kabukbukodan a sagut wenno parabur kas iti talento ken dagiti kayat nga aramiden.

Kuna ti maysa, siak, narangrangrangak gapu ta siak ni nalabaga [red], siak met ni naranja, [orange] siak ni duyaw [yellow].

Nabatadak met ta siak ni asul [blue], ngem nabulbuldagak ta siak ket berde [green] a nasadiwa, namarisak met a siak ti kinalamuyot a buya mayasping ken ni asul ta siak ngarud ni indigo, mayatadayak met iti kinabatad da asul ken indigo gapu ta siak ni bioleta.

Ket kitaentayo ti maris ti bullalayaw. Nagtitiponda a mangted ti namarmaris a buya iti ngatuen ti daga a nayarkos iti langit. Mangyeg ti bullalayaw ti nasaliwanwan a buya ti langit. No dadduma mangted ti arbis, ti tudo. Nagkaykaysaanda a binukel ti tudo a mangbisibis wenno mangdalepdep ti bara ti daga. Ti alibungubongna ti tudo nga umagep iti daga ket mangted ti naisalsalumina nga ayamuom iti makasalibukag. Yaman pay, kunatayo.

Parabur ti Dios ti amin. Kasta met ti tao, no agtitipon ti talento, sirib, ken paglaingan. Adda nalaing ti matemateka, panagsangal, adda nalaing nga agpanunot iti panagplano, sabali met ti nalaing nga agipatungpal.

No agtitipon dagitoy iti agkaykaysa a pigsa ken tunos a maawagan iti “panangtutugmok” dagiti pampanunot [meeting of the mind], nabungbunga ti aramid a pagsayaatan ti ad-adu.

Damagentayo iti bagbagitayo no kasano nga ibingay, ibagay wenno itunos ken ipakat ti panagserbi:

1. maitedmo kadi met la ti dadduma a panawenmo a saan a maagawan ti pamilia

2. maaramidmo kadi met la ti naikumit kenka nga akem ken responsibilidad dayta nga akem

3. kasano ti attitudemo iti maysa a banag, wenno maysa a kabsat

4. kasano nga agbalinka a paset ti solusion, saan ketdi a dadagsen ti problema

5. kasano kawada ken kinawaya ti panunotmo a makidanggay, makiinnadal iti padam

6. adda kadi met la kenka ti kinapudno, kinapakumbaba, kinaanus ken galad a dumngeg, a panggep a dumur-as gapu iti panagsursuro ken panangawat iti panagbiddut

7. ti galadmo a mangirugi, a mangsurnad ken mangipatungpal ti nakaikumitan a banag

8. mabigbigmo kadi ti kaduam, saan ketdi a bukodam ti dayaw no balligi ti gakat, wenno agitudoka no nagbanag a saan a nabunga ti proyekto

9. saanka met la a para dillaw laeng ken agbirbirok iti biddut ti sabali

10. ania ti napateg a maibingaymo iti panagdur-as iti nagan iti panagtitimpuyog

11. nareklamoka kadi ket ipagarupmo a sika la ti husto

12. can-do attitude, hands-on-volunteer ken teamplayerka kadi a maibilang kadagiti achiever

Datayo amin dagiti bullalayaw a mangmaris ti biag ti sangkataoan iti nagan ti panagserbi. Namaris koma a kanayon dagiti aldaw a panagaramid iti pagsayaatan. Ta maidasigdanto kadagiti aramid ken dagiti tugotda iti nagnaanda a dalan ken nagtaenganda a gimong.