Naruay a naserbian iti Manang Imee’s Capitol Express, naragsakan

Napalalo ti ragsak dagiti umili iti Siudad ti Batac kangrunaanna kadagiti nagkasiam a barangay iti panagsubli manen ti Manang Imee’s Capitol Express nga idadauluan ni Gob. Imee Marcos idi Hulyo 24, 2014.

Dagiti naserbian ket dagiti agnaed iti Barangay Maipalig, Quiom, Payao, Mabaleng, Sumader, Colo, Palongpong ken dadduma pay a kaparangetna a barangay.

Segun ken ni Mrs. Virginia Fermin iti Barangay Colo, nasapa pay ngem addan  dagiti kabarangayna iti Batac National High School-Payao Campus a nakaisayangkatan ti Capitol Express tapno gundawayanda dagiti nagduduma a serbisio nga indanon manen ti gobernador.

Inbatadna a dakkel a banag daytoy kadakuada a marigrigat kangrunaanna kadagiti nagpakunsultar iti biang ti medical ken dental services.

Kunana nga iti panagsubli manen ti Capitol Express adda manen ti pagkamangan dagiti kakailianna nangruna kadakuada nga agindeg iti away wenno adayo iti sentro wenno kapitolio probinsial.

Ni Mrs. Fermin ket maysa manen kadagiti nanggundaway kadagiti serbisio a napan indanon dagiti mangbukbukel iti Capitol Express.

Maipalagip a maysa met ni Mrs. Fermin kadagiti immunan a nakaibaga iti tarakenna a burias iti Provincial Veterinary Office nga iti agdama ket adda pay laeng a tarakenna.

Inpeksana met ti panagyamanna ken ni Gob. Marcos gapu iti napintas a programana nga isuna payen a mismo ti mangiyasideg ti serbisio kadagiti kaprobinsiaanna. (PGIN-CMO)