Starter kit ti 100th Million Baby iti Ilocos Norte, naiyawat

Naiyawat idi Hulyo 28 ti “starter kit” nga agpaay para iti maladaga a naipasngay iti Gov, Roque B. Ablan Sr. Memorial Hospital a maibilang a 100 millionth baby.

Nupay 12:54 idi parbangon ti Domingo, Huly 27, nga impasngay ni Revelyn de la Cruz ti nalungpo a babai a maladaga, daytoy ket saan a nakaabot iti pagrokudan ti Population Commission kasapulan a maipasngay ti maladaga iti nagbaetan ti 12:06 agingga iti 12:10 iti parbangon.

Nupay kasta, imbilin ti Regional Office ti POPCOM nga ited latta ti starter kit iti maladaga a napanaganan iti Princess Coleen Calaranan de la Cruz.

Ti starter kit ket naglaon kadagiti aruaten ti maladaga, bathtub ken dadduma pay. Dagiti agina ket agnaed iti Brgy. Balatong iti Siudad ti Laoag.

Mainaig iti daytoy, masayangan ni Ilocos Norte Gob. Ma. Imelda “Imee” R. Marcos gapu ta awan maladaga ditoy Ilocos Norte a karaman kadagiti 100 millionth baby.

Sayang ti napalusposan a gundaway gapu ta daytoy ket maimaldit ken agbalin a paset ti pakasaritaan ti pagilian, kinuna ni Ms. Marcos. (PGIN-CMO)