4 a unit ti gasifier, naited kadagiti tobacco farmers

Maysa a unit  ti  gasifier ti inted ni Ilocos Norte Gobernador Ma. Imelda R. Marcos iti mannalon nga  agmulmula ti tabako idiay Batac kabayatan ti panagturong ti Manang Imee’s Capitol Express iti nasao a siudad.

Ni Marcos ket binayabay ni National Tobacco Administration branch manager Mario Corpuz ken dagiti staff-na kabayatan ti simple a seremonia.

Ti gobierno probinsial ket gimmatang ti uppat a units a gasifier tapno dagitoy ti maaramat a pagluto ti bulong ti tabako.

Maysa ti naited iti Pinili, maysa iti Badoc ken maysa iti Vintar kalpasan a dagitoy dagiti nabigbig ti NTA a mannalon ditoy probinsia a kaadduan ti mula a tabako.

Dagitoy ket da Ambrocio Pungtilan iti Brgy. Baay, Batac City, Buenaventura Islar Jr.  iti Brgy. Pugaoan, Pinili, Alejandro Aurellano iti Brgy, Alay, Badoc ken ni Gaspar Aguinaldo iti Brgy. Bulbulala, Vintar, Ilocos Norte.

Ti panagaramat iti gasifier ket maysa nga alternatibo a wagas ti panagluto ti tabako babaen ti pannakaaramat ti taep imbes a sungrodan iti kayo dagiti pugon nga agdama a maar-aramat a pagluto ti tabako.

Napanunotan ti gobernador ken ti probinsia ti igagatang iti  gasifier tapno matulongan met dagiti agmulmula ti tabako ditoy probinsia malaksid laeng ti pannakasaluad ti aglawlaw.

Inlawlawag ni NTA Corpuz a napintas daytoy a kabaruanan a pagluto ti tabako gapu ta malaksid nga eco-friendly, alisto pay a sapulen ti taep a pupuoran laeng dagiti rice millers.

Kunana nga imbes a mapan agpukpokan dagiti mannalon ti kayo iti bantay, dagiti laengen taep iti usarenda a pagsungrod ken pagluto ti tabako.

Kabayatanna, napalaus met ti yaman ni Ambrocio Pungtilan iti Brgy. Baay, Batac ken ni Marcos ken dagiti dadauluen ti NTA gapu ta maysa isuna kadagiti napagasatan nga immawat.

Inbatadna a makatulong unay daytoy kadakuada nga agmulmula ken aglutluto ti tabako gapu ta malaksid a maibus metten dagiti kayo a pagsungrodda kadagiti pugon  nanamnam-ayda payen uray panawen ti panagtutudo.(PGIN-CMO)