Panagbaniaga ti Biag

Ket sirmataek ti parbangon

A pammasungad agdanapidip a kiray

Ti kinamaladaga ti linnaaw iti agsapa

Dagiti maipasngay nga  ayat muyong

Nasudi a samiweng sonata ni ayat

Dagiti sirayak a raya ti init iti agsapa

Kas met iti panagukrad ti sabong

Itag-ay ti init ti alibungubong banglo-sam-it

Umaddang ti aldaw a kantaan ti kulibangbang

Uray dagiti napudaw a kalapati ken pagaw

Napintas ti aglawlaw iti rayray ti init

Sagut met ti ibabangon iti agsapa

Iti sabali a panangrugi a mangtunton

Ti dalan ti panagbaniaga…..

Agtindek manen ti init ti kinasin-aw

Lumabas ti oras tarakitik ti pagorasan

No aglikig ti init malaylayto ti sabong

Ket sumurot met a matnag ti bulong

Ngem saan a dita ti paggibusan

Ta iti ilalabas iti igid ti lansangan

Ti metropolis, uray ditoy ili ti daan a kaunasan

Dinto met mapunas ti ladawan ket tugot

Sakasaka a sakada a nangibuat ti ekonomia

Ta ti malem addanto met pannakaimbirna

Iti laem ti sardam ti panaginana

Mainawto ti arapaap: adda mainaw a parmata

Iti panagbukar ti sabali a parbangon

Simngay ti ibit ti maladaga a kasilpo

Ti panagbaniaga a mangbirok ti kaibatogan.

Amado I. Yoro

Jan 29, 2012