Di mapukaw ti genesis

Amado I. Yoro

pudno !

pudno, daanen ti lubong

adu a sarita ti maigibus

adu a daniw ti masurat

ken masangal dagiti binatog

ti agsasanggala a tapiko

mabukbukel dagiti daniw

ken dadduma dagiti agnobela

masansan a mauyos ti kundiman

di agressat a matignay ti kuerdas

iti sab-ok ti kannag

ammok: nagtagilasag ti tapok

iti daga a nasibogan

ken napug-awan: ayat

puon ti biag

nupay adda lunod

a nagallawat iti dara

ken dana ti Adan ken ti Eba

masansan a denggek ti pitik

ti ulila a pagorasa

iti siled iti bugtong

iti saklot sidadasay a bulong

ammok: krus daytoy a pakailansaan

patay a kasupapak ti babak

ngem saan a mapukaw ti punganay

krus a kas sam-it ti ipupusay

iti panagsursor kadagiti dalan

ken suli ti laem

aginggana iti 'mangeg ti paltiing'

a paggibusan

ngem adda kaipapanan dagiti lagip

kadagiti agpitik a darikmat

(I)