UFCH convention in Lahaina, Maui, July 2010

(First of a series)

Hulio 23, Biernes, panagbiahe—destination: Kahului Airport.
Sangabunggoykami nga aggapu iti Honolulu. Eddie Agas, Aurea Agas, Philip Alcain ti kinaluganko iti nangisit a Mercedes Benz. Iti pagcheck-inan ti Hawaiian Airlines, dagiti agassawa a Louie ken Lucy Funtanilla. Ben Cabreros. Iti gate 49, nadanonmin da Lucy Pascual ken ti barona ni Michael. Madamdama pay, agsangpeten dagiti dadduma a kaduami a delegado Maria ken Renato Etrata, Ruben ken Lynne Gutierrez, Bernadette Fajardo

 

Nagsangpet met dagiti grupo ti Kauai nga ipanguluan da Abe Iloreta ken Liza Trinidad. Apagbiit ti panagtayab ti eroplano. Binirokmi dagiti bagahemi iti Baggage claim area.

Malemen idi sumangpet da Herman Andaya ken Bong Suerte, agkasinsin agpada a taga Bacarra. 6:15 ti malem idi agluas ti Van ni Bong Suerte. Linabsanmin ti Hawaii Commercial & Sugar Mill iti Puunene. Natangkarang ti simburio. Iti talon, naberde ti kaunasan. Mailasin a nabiit pay a naimula dagiti dadduma. Adda metten dagiti agarup tumawendan. Kaaduan a maapit ti unas a madapil no agdua a tawenen ti unas.

"Sibibiag pay la ti unas ditoy aya," nakunami. "Wen, Manong, kakaisuna a plantasion daytoyen," insungbat ni Bong.

Nasimbeng latta nga agpataray ni Bong. Iti kasla magawgaw-at a puro ti Kooholawe, sa ti Lanai, ket idi umasidegkamin iti Lahaina, daytan ti Molokai Channel ken iti ballasiw ti Isla ti Molokai, the Friendly isle.

Adda estoria a nalagipmi a ti Lahaina ti "Royal capital of Kingdom of Hawaii' 1820-1845 sakbay a nayakar daytoy a titulo iti Honolulu, Oahu.

Lahaina—ania ti Lahaina? Pagsasao a Hawaiian daytoy kayatna a sawen: "Naulpit nga init [Cruel Sun] gapu iti paniempo a nainit iti namaga a panawen [sunny dry climate]. Ti Maui ti maawagan iti Valley Isle gapu iti kaadu dagiti valley iti sakupna.

Maikapiton iti sardam. Nagcheck-in ni Ben Cabreros, Room 815. We were three in the room Philip, Ben and I.

Fun Night ita a rabii.Naragsak a immabat ni Joy Funtanilla, maysa kadagiti committee members. Nakalamisaak da Ben Cabreros, Dr. Villafuerte, Vince Bagoyo, Rep. Keith Agaran, Herman Andaya, Ferdinand Cajigal.

Naragsak ti rabii, husto la unay ti awagna a fun night. Adda nagsala iti rigodon, adda nagkanta. Adda nangabak iti Mr. Barong, ken Ms Terno.

Hulio 24, Sabado. Namigatkami iti Swan Court. Eat all you can. Napaliiwmi: adda dagiti kailokanuan nga agserbi ditoy a restauran.

Alas nuebe impunto a nangrugi ti kombension babaen iti pananglukat ni Eddie Agas, Sr. Naaramid ti imbokasion, nakanta dagiti dua a national anthems. Kimmablaaw ni Herman Andaya, presidente ti Maui Filipino Community Council, organizer, general chairman ti kombension.

Naadaptar ti Convention Rules. Dinutokan ni Agas: da, Donnie Juan, Parliamentarian; Lucy Pascual, convention secretary; Danny Villaruz, timekeeper; Philip Alcain, Felipe Barroga, Ben Cabreros, Abe Iloreta, marshalls.

Nakalamisaanko da Mrs. Hawaii Filipina Kanani Dias, Dr Villafuerte, Aurea Agas, Danny Villaruz, Emmie Villaruz. Nagreport dagiti Island Presidents. Naisaruno dagiti standing ken special committee reports.
Nagreportak iti Membership about 108 unit organizations from the 6 Island Councils: Oahu, Kauai, Maui, Molokai, Lanai, Big Island.

Insarunok ti Social Action Committee gapu ta siak ti Chair. Kaaduan nga aktibidad ti Social Action Committee, ti Feed the Homeless ket no kitaen ti awan langanna iti eskediul, ni Philip Alcain.

Adu pay dagiti sabali a partisipasion ti Social Action Committee, Hawaii Food Bank, Census 2010 Filipinos Count, Fundraising drive for Typhoon Ondoy and Peping Victim, Flores de Mayo, dadduma pay.

Duakami a nagreport ken ni Fe Velasco iti Publicity/Tunos newsletter. Nasirib, talentado ken mapagtalkan a lider ni Fe no proyekto ti pagsasaritaan. Kandidata a para tesorera iti UFCH. Isu ti pinilimi ken ni Eddie Agas, Sr. nga Editor ti TUNOS Newsletter ti UFCH.

(To be continued)