Ket napankami met nakipagdamili kadagiti appo a damilian

Gapu iti nabara nga awis kadakami ni Mr. P Mililani wenno Ernie Pascua iti pudno a nagan, nagkalamisaankami kada Wilson Pascua, KNDI Radio DJ, sigud a kaduak iti KNDI Filipino Fiesta, ken ni misisna ni Aida Ralleta Pascua, Mel Gonzales [Mr. Sarisari] KNDI Radio DJ, sigud a kaduak iti Gumil Hawaii ken Aloha Saluyot Club, ken ni Sylvia Pudiquet Gonzales a misis ni Mel, da Conrad ken Linda Abuel, agpada nga opisial iti OFCC ken iti Bulacan Circle of Hawaii and Associates, Mrs. Marienne Vergara, Virgil Vergara, kaduak ida iti OFCC Special Projects Committee pakairamanan iti Feeding the Homeless, Adopt a Hwy/Park, Walk for Fun, dadduma pay. Iti listaan iti rabaw ti lamisaan, katugawmi pay da 2014 Miss Oahu Filipina Lovely Orsino ken Rev. Dr. Alex Vergara, presidente ti Oahu Filipino Community Council.

State Senator Will Espero officiating the oath taking.

Nobiembre 15, 2014 Sabado, pasken ti San Nicolas Goodwill Foundation, Inc. ditoy Filipino Community Center. Inkarik ken ni Ernie nga atendarak daytoy gapu ti kinapateg ti panaggagayyem. Malasid ken ni Ernie, adu dagiti gagayyem a taga San Nicolas. Pete Ramos iti Tri Media Council, Lions International, UFCH kas publicity chair iti panawenna 1979-1981.

Adu ti pagtintinnulonganmi ken ni Ernie. Kas kaniak, nagpresidente iti OFCC idi 1996-1997 a simmukat iti nasinged met la a gayyemmi Jun Abinsay [Vigan] a nagpresidente met idi 1994-1996. Adu a proyekto ti nagkakaduaanmi. Kaduak ni Ernie a nangipataray ti OFCC convention idi 2001, ti kaaduan pay laeng a delegado [488] ken unit organizations [96] a naangay iti Hawaii Convention Center. Ni Ernie ti General Convention chair, dakami met ti Nomination and Election Chair. Lima ti nagtaray a para presidente, ni Eddie Agas, Sr. ti kaaduan ti nabotos uray agtitipon ti botos dagiti sabali nga uppat, madi pay mapatas ti nabotos ni Eddie. Maysa kadakuada ti nakabotos laeng ti maysa, kayatna a sawen – awan sabali a bimmutos, piman, diay la bagina

Ken ni Jun [Abinsay] masansan a kaduak iti tinawen nga OFCC convention. Kaduak a nakipagbangon iti Ilocos Surian Assn of Hawaii [1977], ti Vigan Assn of Hawaii [1983] Gumil Oahu [1996] kaduak iti Port Salomague Filipino Sakada Golden Anniversary Committee [1986] isu ti autor ti linteg namagbalin ti Filipino Centennial Celebration Commission a pinirmaan ni Gobernador Benjamin J. Cayetano ti Act 159 a nakadutokan ti 15 a komisionado a nangiplano, nangisagana ken nangiwardas iti pannakaselebrar ti maika-100 a tawen dagiti immuna a 15 a sakada a naggapu iti Candon, Ilocos a rinikruta ni A. Judd a nangibagi ti Hawaiian Sugar Planters Assn, nailugan dagitoy a 15 iti SS Doric a simmanglad iti Port of Honolulu idi Disiembre 20, 1906. Dagiti 15 a komisionado: Eddie Agas, Sr., Anacleto Alcantra, Cornelia Anguay, Belinda Aquino, Artemio Baxa, Elias Beniga, pangulo, Leticia Castillo, Serafin Colmenares, Leo Gozar, Raymund Liongson, Jake Manegdeg, Oscar Portugal, Homer Rabara, Ben Saguibo, Amado Yoro.

Amado Yoro, Senator Espero and SNGF of Hawaii president Ernie Pascua.

The San Nicolas Goodwill Foundation, Inc. aka Damilians gapu kano ta ti ilida ket ili dagiti agdamdamili: banga, lusob, dalikan ken dadduma—isuda kano dagiti aglako iti "daga nga awan ti titulona....

Adu ti propesional a taga San Nicolas ditoy, radio, restaurant, insurance, financial and business, adu a kita

Parte ti programa nga inturong da Mel Gonzales ken Edith Pascua.

Panglukat a sarita ni Roland Pascua, bise, kararag ti indauluan ni Vesy Pascual, kanta nasional dagiti kameng ti Himig at Indak, Damilian song ti kinanta dagiti opisiales.

Kanta:

Taga San Nicolaskami nga agdamdamili

Naragsak ti biagmi, awan ti dukdukotmi

Numan pay adut manglalais kadakami

Ta napanglawkam la nga agdamdamili/

Tay napigket a daga, ramasenmi nga umuna

Danggayanmi ti kankanta, takiagmi a napigsa

Kettang ken bannogmi dikam la ingingina

Aglalo no adda ni manong ditoy denna.

Sakamto met la sukogen banga, dalikan, damilien

Pitpiten a nalaing, linisen ken pasilengen

Tapno iti kasta ket magargarida amin

Ket nalaklakadanto nga inkam lakuen

Gumatangkan manong sukat banga a nabuong

Tapno saan a masursuron tay kadungngo dungngom

Tapno di kumiting gayad ta lailom

Ket di met bumaaw pudot dayta kariniom.

Dagiti opisial a pinagsapata ni State Senator Will Espero, Hawaii Senate Vice President, anak met ti Santiago, Ilocos Sur ken La Union.

Ernie Pascua, presidente, Roland Pascua, bise. Tess Quemado, sekretaria, Madeline P. Barut, katulongan a sekretaria, Aida Layugan, tesorera, Cielo Oda, katulongan a tesorera, Edith Pascua, auditor.

Para irakurak: Cris Ugale, Cora Rulloda, Charlene Racimo, Solah Palaroan, Kelly Manzano, Maryson Cabudoy.

Sarhento de Armas: Flor Ungos, Fred Bayudan, Sonny Rulloda, Lino Palaroan, Medy Racimo, Sam Garcia.

Hunta direktiba: Gloria Abad, Aida Paguirigan, Acela Garcia, Mely Manuel, Carmen Racimo, Romy Barut.

Mamagbaga: Conrado Paguirigan, Adelino Simon, Elpidio Paguirigan, Boni Manuel, Mario Layugan. Amy Ungos, pasado presidente.

Dagiti met nagasat nga scholarship recipients:

Filipinas: Deanne Kyle Lazaro, Clyde Rosquetta, Deceree Joy Sacoco, Princess Dianne Caletena,

Hawaii: Alyssa Marie Garcia, Kelly Manzano, Jordan Perkins Pascua, Charlene Mae Racimo, Michael Lyod Salvador, Lorelei Bulosan Rabanal.

Iti panagsarita ni Espero kinunana a nasken ti pannakipartisipar iti ania man a tignay a mangpaslibukag iti political involvement. Nasken ti panagrehistro ken panagbotos no aldaw ti eleksion. Saanen a paudi ni Filipino no bilang iti populasion ti pagsasaritaan. Nasken ti panangitandudo iti bukod a puli. Saan a gapu ta awan ti gasatna itay naudi nga eleksion iti panagtarayna iti US Congress, District 1, ngem panunoten koma ti masakbayan ti ad-adu pay a Filipino. Binigbigna ti pulitayo a nakapataudtayon iti maysa a gobernador. Kaanonto manen kinunana.

Iti met panagsarita ni Ernie Pascua, inkarina a nakasagana ti SNGF of Hawaii a makitinnulong iti komunidad iti ania man a pagsayaatan ken pakaidur-asan a Filipino. Pudno a kaaduan dagiti gunglo a mangitantandudo iti social ken cultural, ngem dakkel met ti pagsayaatanna iti panangidur-as iti kandidatura dagiti kadaraan – dagiti napudno nga agserbi ken maikarida nga itandudo.

Kameng ti SNGF of Hawaii iti OFCC/UFCH.