Impasigurado ni Ilocos Norte Gobernador
Ma. Imelda “Imee” R. Marcos nga itultuloy ti gobierno probinsial ti programa
nga “INEC Bill Mo, Sagot Ko” kadagiti Non-MDG ken MDG schools ditoy
probinsia.
Daytoy ket tapno saanen nga
ibaklay pay dagiti nagannak ti pagbayad ti koryente nga usaren dagiti
annakda iti pagadalan.
Segun ken ni Ms. Matilde
Neri, officer-in-charge ti education department ti gobierno probinsial, binulan
nga ibaklay ti gobierno probinsial ti makunsumo a koryente dagiti amin a
Non-MDG ken MDG Schools.
Inlawlawagna a mapagtitipon
amin dagiti monthly bills ti Ilocos Norte Electric Cooperative (INEC) manipud
kadagiti nabigbig nga MDG ken Non- MDG Schools ken diretson a bayadan ti
probinsia iti INEC.
Basar iti listaan ti nasao a
departamento ti gobierno probinsial, umabut amin iti 65 ti bilang
dagiti Non-MDG Schools manipud kadagiti 16 a
pagadalan idinto a dagiti MDG Schools ket umabut iti 172 a pagadalan
manipud kadagiti 20 nga ili.
Iti Non-MDG Schools, agdagup
amin iti 48,503.94 a pisos ti nailatang a pundo idinto nga iti MDG schools
ket 217,484.30 a pisos amin para iti school year 2013-2014.
Ti pundo ket aggapu
ti Special Education Fund wenno SEF ti probinsia.
Ti “INEC Bill Mo, Sagot Ko
Program” ti gobierno probinsial ket paset metten ti Sirib Express ken Capitol
Express a programa ni Gobernador Marcos. (PGIN-CMO)
Comments
Post a Comment