Stipend dagiti Iskolar ni Manang Imee idiay Pinili, naibunong

Umabut iti  P135,000 a financial assistance ti naibunong ti gobierno probinsial kadagiti  448 nga agad-adal iti elementraria ken sekondaria a karaman iti “Iskolar ni Manang Imee”  iti Don Mariano Marcos Memorial Elementary School iti ili a Pinili.

Daytoy ket bukbuklen iti 333 nga agad-adal manipud kadagiti 19 a pagadalan elementaria ken 115  nga agad-adal manipud kadagiti dua met a pagadalan sekondaria.

Tunggal elementary pupil nga adda iti listaan ti Iskolar ni Manang Imee ket immawat iti P250 nga stipend iti kada tawen idinto nga iti secondary level ket P450 ti awaten ti tunggal iskolar.

Naibunong a mismo daytoy kadagiti agad-adal ken binayabay met dagiti Sirib Express Team partikular ti Education Dept. ti gobierno probinsial.

Nairanta a pagbayad met laeng daytoy dagiti ubbing kadagiti obligasionda iti eskuela tapno awanen ti pagparikutan dagiti nagannak.

Ti nasao nga scholarship ket agtultuloy a programa ni Ilocos Norte Gob. Ma. Imelda R. Marcos kadagiti nasasaririt nga ubbing nga agkurkurang iti gastusenda nga agbasa kas tulong metten ti gobierno probinsial kadakuada.

Ti pannakaibunong dagitoy nga stipend ket inatendaran dagiti agtuturay iti nasao nga ili, ni Vice Gov. Eugenio Angelo M. Barba, Sangguniang Panlalawigan member Engr. Albert Chua, school heads ken ti district supervisor a ni Ms. Rosalinda Salmazan.

Kabayatanna, margaragsakan met dagiti immawat nga ubbing gapu ta dakkel a tulong daytoy kadakuada kangrunaanna kadagiti nagannakda.

Inpeksada ti panagyamanda ken ni Marcos a kanayon a tumultulong ken mangar-aramid iti addang tapno matulongan dagiti agkurkurangan iti gasat. (PGIN-CMO)