Serbisio iti Sirib Express inlawlawag ni Imee

Adal, Edukasyon ken trabaho!

Kuna ni Gobernador Ma. Imelda “Imee” R. Marcos a dagitoy dagiti kangrunaan a linaon ken ipapaay a serbisio  iti Sirib Express a baro a programa ti kapitolio probinsial para kadagiti agtutubo.

Inlawlawag daytoy ti gobernador kabayatan iti panagturong ti grupona iti Imelda Cultural Center iti Siudad ti Batac a nagyanan dagiti estudiante iti Batac National High School nga addaan iti tallo a campus ti Payao, Bingao ken Poblacion Campus.

Dinayaw ken inpannakkel met ti gobernador nga iti nasao a siudad ti paggapgappuan dagiti nasasaririt a lider ken ayan iti napintas nga unibersidad.

Masapul a maipaayan ti naan-anay nga adal ken padas dagiti estudiante kadagiti mabalin a pagsapulda kalpasan a makaturposda iti inda panagadal uray laeng iti sekondaria.

Daytoy ket babaen kadagiti maididiaya a serbisio nga ipapaay dagiti pannakabagi ti Sirib Express manipud kadagiti nagduduma a departamento iti kapitolio probinsial.

Dinakamat ti gobernador iti Provincial Engineering Department a pagpatulungan ken asitgan no kayat ti agsursuro iti automotive wenno agtarimaan iti lugan.

Kunana nga adda met ti Scholarship Program ti gobierno probinsial a mabalin nga aplikaran dagiti nalalaing nga estudiante kangrunaanna kadagiti sumrek iti kolehio.

Inlawlawagna nga adda pay iti 700 nga slots para kadagiti ubbing a kualipikado nga agbalin nga iskolar ti probinsia iti Mariano Marcos State University (MMSU).

Imparangarangna nga agur-uray pay iti 600 nga slots kadagiti mayat a sumrek iti bakasion wenno agsummer job iti probinsia.

Iyapal met ti gobernador dagiti kalugaranna iti Siudad ti Batac a manggundaway iti Special Program for Employment of Students iti probinsia a saan laeng a taga Siudad ti Laoag. (PGIN-CMO)