Pagsasao

Adtoy ti sabali manen a bansada dagiti kapanpanunutan a mabalin a mausartayo iti bukodtayo a panagbiag:

No dagiti igammo ket kararag ken kinagaget, malasatam dagiti rigat nga inka makasaranget.

Naim-imbag tay digo't bukasit ngem tay lauya nga aggapo't kinukusit.

 

No lipatem dagiti nasken, biagmo ti kumsen.  

Ti kagurana't madillaw agnanayonto a mauy-uyaw.

Awanto ti mangpa-arikap iti nasadot a dakulap.

Narigat ti agtangtangsit, no awan pay napaneknekam uray sangkabassit.     

Ti kasla silyasi ti ulona, isaang ken aronanna ti bagbagina.

Awan ti naimbag nga agtaud iti tao nga ingget ulbod.

Nasaysayaat pay ti agserbi iti ngumernger a tigre ngem ti makikaddua iti karasaen nga aginpapasimple.

Ti biag ket kasla karayan. Ti nasken ket ti panagayosna, saan a ti kina-adalem wenno kina-ababawna.

Narigatka a makaadayo no ti pammatim ket agmamayo.

Ti saan a panagboses kontra kadagiti mangidadanes ket panangkunsintir iti kinadakes.

Ti nakaro a kinapangas ket agtaud iti panunot nga awanan bugas.

Ti nalabes a kinauyong ket kadawyan dagiti agmauyong.

Ti panangtagibassit kadagiti pagarupem a nengneng ket maysa a klase ti kinakuneng.

Mangriing ti naruay a gura ti nalabes a kina-ariwawa.

***

BARD NOTES: Happy bard-reading to Governor Imee Marcos, Laoag City Mayor Chevylle Farinas, Laoag City Vice Mayor Michael Farinas, Provincial Treasurer Josephine P. Calajate, Dr. Castor Bumanglag, Dr. Miramar Bumanglag and PNB Laoag Manager Metty Guerrero.

Happy reading also to the members of the Bad Circle Runners and to the employees of AMA Laoag, PNB Laoag, DEPED Laoag and Vertext.