Thanks God makapagnaak manen; Apo ituloynak a kibinen

Anian a pasamak! 

Inyaddangko dagiti sakak. Magnaakon. Wen, magnaak manen uray no awanen dagiti dua a crutchesko.

Tallo a bulan manipud Disiembre 27, 2011 aginggana iti katapusan ti Marso 2012, dua a salingkadang ti aramatek a magna iti agsumbangir a kilikili. Kasla saan a nakapapati ngem pudno, kasla diak naibturan dagiti sakit, sanaang, ut-ot ken rigatko a nagitured  ti bunga iti daksanggasat ken  maysa a nalaad nga aksidente iti biagko.

 

Adda awis ti malas

Agsapa ti Martes dayta a bigat iti Disiembre 27, 2011, kas gagangay nga ensayomi ken ni Gloria no kasdiay nga adda day-off iti trabahona, agkuyogkami a magna kas paset ti programa iti Physical Fitness and Health Maintenance ti bagimi gapu ta agpadakami metten a limmabas iti innem a buko (dekada) ti tawen. After 60, agannadka bagi.

Nagtulaganmi a dua a milia [agarup uppat a kilometro] ti danonenmi tapno agtotal nga uppat milia [walo a kilometro] no makasublikami iti balay.

Kabayatan a magmagnakami, tultulaganmi dagiti sumaruno a proyektok iti balay, mairaman ti panagatep, pannakatarimaan datar, pannakapinta ti uneg ken ruar ti balay ken panangurnosko iti kanatengan ken kamasetasan, kdpy.  

Sabagay, narugiakon ti mangsukat ti daan nga atep iti baro ket nalpasen ti maysa a bangir kadayta a lawas a kinaduak ti maysa kadagiti kaanakak a lallaki.

“Mabalinmonton a yakar ti palapala [scaffold] angkel ken dagiti step ladders ta isublatta ti sabali a bangir ti balay,” kinuna ni Ronnie.

Ti ngamin sango ti balay a batog ti kosina ken ti kuartomi ken ni Gloria ti inyunami nga sinuktan ti baro nga atep. Yakarko ti palapala ken dagiti agdan a pagbatayanmi iti sabali a bangir ti balay.

Ti gapuna a tarimaanek ti atep tapno makalasat iti paglintegan ti homeowner insurance company.

Nalpaskon idi Disiembre 2 ti panangpainderko ti nagirig nga alad [hollow tiles] iti sikigan ti garahek. Maysa a bulanko a nangtrabaho a sisiak. Adda dagiti mayat a mangkontrata ngem apay ketdin a pakontratak pay, siak lattan ti mangtrabaho, adda met ammok iti konstraksion, isu pay a masalbar.

Dayta a bigat a magmagnakami ken ni Gloria iti regular a rotami a Fort Weaver Rd, ket nadanonmi ti West Loch Fairways, agarup nasuroken a milia manipud iti balay idi giddato nga:    'agsublitan’, kinuna ni Gloria.

"Ket no apagggudua pay ti tulagta a pagnaen," imbalesko.

"Intan, ta innak man gumatang ti orange juice dita Seven Eleven Store sa aglabaak pay kadagiti dulpet”, inyud-od ni Gloria.

Ket ania pay, nagsublikamin iti balay.

Di pay naglinsaed ti kapek no arigen, inkapetkon ti hardhat, construction pouch a naglaon iti alikamek, immuliakon iti palapala [scaffold] nga agarup pito a kadapan iti kangatona tapno yakarko.

Rinugian metten ti Gloria ti agyakar kadagiti maseterana tapno saan a dalapusen ti yakarko a palapala ken agdan a pagbatayanminto manen kadagiti kakaanakak a mangituloy ti agatep.

Sakbay nga agikkatak kadagiti tabla iti palapala, inlansak ti 1x3 a tabla a mangapput ti nagbaetan ti baro nga atep ken ti naglansaan. Iti maudi a lansa a binanatak, giddato a nadlawko a nagalus-osak. Nabkang ken nagruk-at gayam ti naisilpo a 2x6 iti palapala. Napukawkon ti balansek, simmurotak iti nagkamlos a tabla, dinalapusna ti nakatakder a step ladder, Naippaladaw ti martiliok, nagdisso ti kanigid a patongko iti semento, natnagakon, Gloria, impukkawko ken ni Gloria nga adda iti asideg.

Naipalladaw ti hardhatko. diak natenggel ti ulok a naibaut iti iking ti tugawan ti masetera,

Ket aniattan, kinuna ni Gloria.

Kinarawak ti asideg ti aligusgosko, dara, dinupagko, dara! kinarawa ni Gloria, dara!

Madlawko nga agkaribuso ni Gloria, ngem kinunak nga easy easy. Napan nangala iti dadaan ngem kallaba nga ules iti sirok ti marunggay tapno adda pangbarabadna kaniak. Innalana ti first aid kit, ket kas CNA, inyaplikaranna ti ammona iti first aid.  

Iti Emergency Room iti Pali Momi Hospital, Aiea ti nangisangpetan ni Gloria kaniak.

Nadiagnosak. Tay ut-ot ti ulok itay, atiwenen ti ut-ot ti kanigid a palaypalayko  nga ita la a madlawko. Kanigid a palaypalay ti tumulangen ti ut-ot.

Inamirisdak, ineksraydak.  left inside ankle, fractured bone. head laceration, 3 inches, 7 staples ti naikapet,  inside left elbow severe bruises, inikkandak ti 2 crutches nga usarek.

Malas,  talaga a malasko ti Disiembre 27, 2011

Head laceration - 3 inches with 7 staples; left ankle inside fractured with special tourniquet; left hand inside elbow bruises; left side buttock lump.

No saan a gapu iti nabkang ken rimmuk-at a tabla a naguyasak, ket diretso koma a nagdisso iti daga a naitaga kadagiti hollow tiles, amangan no naudi nga aldawkon ti Martes, Disiembre 27, 2011. Naisurat koman ti obituaryk.

Nagasatak pay laeng, nabisitak met la ni Lia nga apokok iti ospital a nayanak idi Enero 1, 2012 nupay saan a dayta kaaldawanna a nayanak.

Kas paset ti pannakaiproseso ti maisagana a pannakaagasko, nasken a surotek ti bilin ti doktor.

Enero 4, 2012 idi impannak ni Gloria iti Queens Medical Center tapno amirisenda ti sugatko.[Mailagip: Ditoy met la nga ospital a naaramid ti operasionko a nakaospitalak iti uneg ti sangapulo nga aldaw idi Hunio 19-30, 2010. Siam a pulgada ti ukrit ti kanawan a bakrangko. Nasurok a tallopulo nga stapler ti naikabil].

Ineksamennak ni Dr. Alexander Garber, maysa nga Orthopaedic surgeon. Kalpasanna, inrekomendana a nasken ti operasion ti kanigid a palaypalayko. Impasakbayna nga adu nga aldaw ti panagsarukodko no mapasamak iti surgery iti kanigid a palaypalayko ta iserrekna ti dua a babassit landok a kasla lansa wenno ruskas a mangtengngel ti nabuong a tulang.

Biernes ti Enero 13, 2012, addaak manen iti siled ti Pali Momi Hospital. Inamirisdak manen dagiti dodoktor tapno maipakat ti operasion. Ikkanda ti dua a babassit a landok iti kanigid a palaypalayko. Naipakat ti anesthesia. Indawatko ken ni Apo Dios iti nasayaat a pagbanagak.

Enero 24, 2012 Martes idi maikkan ti kanigid a sakak iti semento [cast] tapno saan a magargaraw unay ti sugat iti uneg. Sarungkarak ti doktor kalpasan ti makabulan.

Mierkoles Enero 25, 2012. daytoy nga aldaw ti maika-30 nga aldawen a diak makaganaygay gapu iti sugat ti palaypalayko. Nasaem pay laeng iti kaikabkabil a cast-semento tapno natalged a saan a makapagalagisi ti  dua nga ruskas iti uneg.

Adu dagiti nalibtawak nga aramid. Naut-ot ken diak makapagsimpa nga agidda wenno agtugaw. Kabayatanna, maysa a napateg a pagayam Prescy B ti simmangpet ti email messagena:

Napateg a Kabsat

Salsaludsodek iti bagik kadagiti kallabes nga aldaw: Apayen a nakaul-ulimekka? Iti isasangpet daytoy "Testing Message" diak nagtaktak a simmungbat. Ti namnamaek ken nakairuamak basbasaen - dagiti nakapila nga aktibidadesmo - alinggaget ti simmangbay iti pannakabasak iti umuna a paset.

Napateg a Kabsat, kuna ti nasantuan a Libro "Iti amin agyamanka." Kinaulbod no pagyamanta ti napagtengmo idi kalpasan-Paskua 2011. Ngem pudno gayam nga adda pagyamanan - kalpasanna. Agyamantayo iti Apo ta sumaysayaaten ti kasasaadmo. Don't despair - the days you said you lost - are not exactly lost. Within those days you are recovering your loss. Napateg a Kabsat, dakami ken Merced, ikarkararagmi ti nadaras a yiimbagmo. God bless us.        

Sungbatko:

Insubalitko: Husto ti kunam nga agyamanak ta saan a sabali a banag ti nagbanagak. Insalakannak pay laeng ni Apo Dios. Iti baet ti panagsagsagabak ita, naimas ketdi ti kaanko. Agsinnublat iti uneg ti kuarto, kama, salas ken garahe a pagdakiwasak iti dua a sarukod. Siripek sagpaminsan ti email, agbuyaak ti TV. Adu dagiti diak maasikaso iti paraangan. Ngem ammok a makauray dagita. Adda met dagiti awis a pasken, ngem mabalinko a kuna: saan pay nga ita, maminsanto laengen.

Kastoyak kadagiti aldaw a panagsagabak. Bagik ti mangngetngetnget ti napalaus a saem ken sanaang daytoy sugat nga inted ti nalaad disgrasia iti Disiembre  27, 2011.

No ar-arigek, iti labes ti kinaimas ti kaanko, sopas, sinigang adda silina nga ikan, pulos a dinak paturogen ti ut-ot. Diak ammo ti uluanan ken pagsikigak a mangisimpa ti kanigid a sakak.

Dua a tabletas a pain killer, oxycodone, percocet ti kada innem nga oras, alay-ayanna met kas pammagusto, ngem no kasla agkarayamen dagiti KASLA adu  a kuton, gayaman ken anay iti nagramaram a saem ti sugat, ay apo aya, kasla masulnot ti anges ken aglulok amin a laslasagko - annay, annay, maisurot a mabaringkuas ni Gloria iti abayko. Agtalaytay ti dakulapna a mangpedped ti saem, nagtomarkan? Pamrayanna la piman a kuna, ta ania ngarud ti maaramidna no di mangay-ay ken mangandingay.

Puyat, agpakaturogka man sika a saem, ikkannak met ti orasko nga aginana, kunak a yandingay ti bagik.

Adun a Domingo a diak napan iti simbaan. Ngem kaasi ni Apo Dios mapan latta met ni Gloria, mangted latta met kas maiparbeng. Immay metten ni Apo Padre Randy Albano, nangsarungkar kaniak, kaduana dagiti dadduma nga opisial ti simbaan, inkararagna met ti napardas a panaglaingko. Kankanyon nga idawdawatko ken ni Apo Dios to restore me into my normal condition. Malaksid ti prescribed medicineko, the most powerful and most effective prescription I have is GOD'S grace and blessings.

Nakaaduta manen, kabsat. Kayatko ti agyaman kenka ken ni Merced, kaduakayo a mangidawdawat ti panaglaingko manen. Adukayo nga immawag ken nag-emailen kaniak, banag a mangipaneknek a saanak nga agmaymaysa. I am strong in spirit, in hope, umayto ti naikeddeng a panawen - addada amin iti IMA TI DIOS.

Masansan nga ikarkararagko: “Diosko, please help me, restore my normal health” makasangitak payen ta awan metten ti maar-aramidak. Ngem no malagipko dagiti nabasak iti Biblia:

 “Rejoice always. Pray without ceasing. Give thanks in all circumstances, for this is the will of God in Jesus Christ for you”, 1 Thessalonians 5: 16-24

Awis ti simbaan

Gapu ti ruamko a mapan iti simbaan iti tunggal Domingo, indawatko ken ni Gloria nga ikuyognak iti simbaan ita a Domingo, Pebrero 5, 2012. Ket saannak a pinaay nga inkuyog ni Gloria uray no dua ti sarukodko. Lima a Domingo ti nalibtawakon.

Iti panagsublik iti simbaan, kaslaak man la nadigos iti kappia ken pannakapalag-an. Adtoy ti binatog a naisuratko iti nalaus a panagyaman.

Adda birtud idi immayak nakipangan ken nakiinum

Agyamanak ta nakapanganak [manen] ken nakainumak [manen] ti tinapay ken arak ket kasla man la napedped ti bisin ken wawko - Agyamanak kenka Apo Dios.

Immayak a nakasalingkadang, namantenirko ti isem [ken rupanget], nangegko ti kinunam: awan ti panawen iti panagretiro iti nagan ti panagserbi ken iti nagan iti napigsa a pammati.  AMEN

Wen, Apo, bareng no mapasublik daras ti normal a salun-at ken kondision ti pannagnak. Ni la Apo Dios ti makapaimbag ket urayek ti umisu a panawen.

Dayta nga operasion, malagipko ti kinuna ti surgery doctor: your roof is too expensive this way. $12000.00 ti billko, imbag a sakupen ti Medicare to 90 percent. Ngem awan ti maaramidak no umay ti giddato nga aksidente.

Adda Naibunga ti Pasamakko: Rinugiak ti nagna iti maysa a milia iti trenta minutos. Umat-atiddog bumaybayag.

Iti organisasionmi iti Annak Ti Sinait ken ti Sinait Alumni Associaition of Hawaii, inyemplementarkon daydi inrugik ti programa a Walk for Fun BE FIT SINAIT ti agbinulan a pannagna iti lima a milia  tunggal umuna a Sabado iti kada bulan. Maysa a kangrunaan a panggep: manteniren ti salun-at, ken maysa a kita ti fundraising. Tapno mangurnongkami iti para medical mission idiay  ilimi a Sinait.

Inyemplementarko metten ti nabayagen nga arapaapko a mangur-orkami ti pondo ti maipasdek a Marker wenno batonlagip ti Pugot a Nazareno. Nakaur-orkami pay iti pagpatakdermi iti Sto Cristo Milagroso wenno Black Nazarene idiay Logo Dadalaquiten Norte, Sinait, Ilocos Sur, ti Logo ti mapapati a nakaisadsadan ti Pugot a Nazareno.

Iti Walk for Fun, inaramid met dagiti kameng ti Vigan Association of Hawaii. Timmulad ti Association of American Retired Person a dinangayan ti Oahu Filipino Community Council, banag a nakapataudan ti arayat kadagiti nabiktima iti Bagyo Yolanda/Haiyan.

Itan, kas inkarik iti bagik, mapagnakon ti 3-4 a milia iti inaldaw. No saanak a makaruar a magna iti agsapa, innak iti dandani lumnek ti init.

21-28 a milia ti linawas, wenno  84-112 iti binulan; 84x12=1008 tinawen; 112x12=1344 tinawen.

Adda agkuna: kasla ub-ubing ti langam ngem ti tawenmo. Ania ti pamay-am.

Isungbatko: Napasnek ken naimpusuan a panagkararag ken pannakikomunikasion ken ni Apo Dios. Inaldaw nga ensayo ken umdas a turog ken inana. Regular a pannangan iti husto a taraon: avocado, sandia, balut, tirem, nateng, prutas, templado a kape. Nayon ti ensayok: aglangoy iti baybay, ball bouncing, ken  makitungtong kadagiti gagayyem.

Iti kaudian a bisitak iti doktorko, Normal kunana iti BS 120/80; BP 124/75/72: SDP [Systolic, Diastolic, Pulse Rate] 140 a libra [70 kilos] ti dagsenko sipud pay 1997, no man ngumato wenno bumaba ti timbangko ket 136-144. Vision: tinawen la a tsekap. Colonoscopy: Normal.

Disiembre manen. Tallon a tawen, adtoyak pay a nasalun-at babaen iti Nailangitan a Bendison ti Apo. Kabayatanna, naituloyko manen ti community service and volunteer workko pakairamanan iti agbinulan a Feeding the Homeless, ti Adopt a Hwy ken Adopt a Park ken dadduma pay a pannakitinnulong iti simbaan, komunidad ken nadumaduma a gunglo Filipino.

Wen, Apo. Kuyogennak iti inoras ken inaldaw tapno maituloyko dagiti napateg a proyekto iti komunidad pakairamanan ti Oahu Filipino Community Council, UFCH, Ilocos Surian Assn of Hawaii ken Annak ti Sinait, kangrunaan iti simbaan iti St. Paul’s Church ken tumulong kadagiti homeless ken community outreach babaen iti My Mission Day Service, kdpy.