Monday, October 27, 2014

Agmulatayo iti bukbukel

Agmulatayo iti bukbukel


Amado I. Yoro
Ewa 9/25/0214

Daytoy ti bukel ti ayat
Bay-annak a mangitukit
dita barukong ken iti imeng
dayta pusom iti namnama
nga agrusing ken agtubo
iti kaunggam: semilia ti biag !

Daytoy ti bukel ti isem
Bay-am nga isangbay dagiti
mailandayag a panagbukar
dagiti agsapa kas met iti sabong
iti muyong iti ayat ken pateg
ti nakaparsuaan: ibabangon ti init!

Daytoy ti bukel panagserbi
Bay-am dagiti ima, takiag
ken dakulap ti panawen a mangsakruy
dagiti kaasi ken ayat ta itdenna
ti pannakaagas dagiti babassit a sugat
nga imbati ti duadua ken naglumen
a pammati:  nakaukrad a takiag!

Daytoy ti bukel pannakaawat
pammakawan met daytoy
a mamaglunit ti rikki ti susik
dagiti saan a naannadan a rikna
ken diktar ti panawen: rekonsilasion!

Daytoy ti bukel ti katawa
ti ragsak, ti namnama
ti panagrangpaya ken panagsantak

talinaay talna, kappia ken talged.

No comments:

Post a Comment