Wednesday, October 15, 2014

Isublim Kaniak Ti Kalman

Isublim Kaniak Ti Kalman
Amado I. Yoro

Diak maliklikan dagitoy:
alipaga
ti iliw
ti segga
ti gagar.

Ammuem dagitoy, Ayatko:
adda uram
a di masebseban
ti nagbaetanta
a taaw,
mabalinak pay met
a kunaen:
"ay-ayatenka !"

Dawatek dagitoy:
isublim kaniak ti kalman,
dagiti bara
ti ayat
ti pammateg
[Ita la nga ammok
a pasetnak pay la
ta pusom].

Agkitatanto pay ngata?
[uppat a pulo ket maysa a tawenen
ti naglabas]
Wen !
Urayem nga agsubliak
ket pagraipenta
ti ungto
ti kalman.

Arig layap ti lagipko
simmalput iti ulep
iti langit
iti tangatang
dinaliasatko law-ang
ta kinataom:
Sika !

Nagpintasen ti manglagip
iti lipat addaka manen
kadagiti pikapik
ti sursuratmo
kayatko ti agsubli
iti sabali a panagsubli.
ken ibabangon
iti sabali manen nga ibabangon.

Denggem:
Ay-ayatenka met !


No comments:

Post a Comment